Vortaro

Esperanta vortaro,

Sorĉa mar’ da lingveroj,

Liveras al homaro

Multnombrajn vorterojn.

Tra senlima paŝtejo,

Vortojn paŝtas poetoj

Kaj ilin zorge nutras

Por nin regali bele

Per poezia plezur'.

Maria Nazaré de C. Laroca

Juiz de Fora, 14/01/2013

Donaco

Reĝo estas iu ajn

Riĉul’ aŭ mizerul’.

Sufiĉas mateniĝi

Por ricevi homoj

Tute novan trezoron

El gemoj altvaloraj:

La horojn de l’ tago,

Kiujn senpripense

Oni malŝparas.

 

Maria Nazaré de C. Laroca

Survoje al Juiz de Fora,13/01/2013

Suno

Kunvojaĝas sun’

Sub haŭto mia

Brunigita bele.

 

Sed ĝi ne sukcesis

Disrompi ankoraŭ

Ŝtonan koron fridan.

 

Dia labor’ fervoras…

Ĉar sun’ kisas ĉion:

Maron aŭ marĉon.

Kio aŭ kiu

Ne gravas... Do

 

Kial l’egoisma

Pens' jarcenta

Esti sun’ nur

Posedo mia?

 

 Maria Nazaré de C.Laroca

 Kabo Frio, 13/01/2013

 

 

 

Ĝis baldaŭ!

Eĉ sub pluveto frida

La plaĝo renaskiĝas

Iom post iom.

 

Distaj montoj, ŝipoj

Dormas horizonte...

Subite sunokul’

Malfermas kurtenon

Nur por ekrigardo.

 

Mevoj akrobatas,

Fiŝkaptante gracie

Dum el likva trezor’

La poet’ vortkaptas...

 

Liberon kaj esperon

Li tre zorge ekprenas

Kaj ĝisrevidas kore.

 

Maria Nazaré de C. Laroca

Kabo Frio, 12/01/2013

 

 

 

Pluvo

Finiĝas marferioj.

Nevideblaj

Dankaj vortoj

Ŝprucas.

 

Mi adiaŭas do ...

Mantel’ el pluv’

Volvas la urbon.

 

Gutojn

El plezur’

Mi plukas

Por plekti

Kolĉenon

Kaj ornami

La sinon

De l’ mar’.

Vivĝojo

Hodiaŭ sun’ ferias:

Plejeble ĝi dormetas

Sur nuba lito griza.

 

Milde flugas veter’,

Ĝojon ĝuas banistoj:

Vivlernantoj ĉe mar’...

 

Ja farnientas multaj

Krom mevoj kaj vendistoj

Kaj senĉesa ondar’ ...

 

Maria Nazaré de C. Laroca

Kabo Frio, 10/01/2013

 

 

 

 

 

 

Vivtransiro

Deliras l’ animo,

Doloras la haŭto.

Anim’ tra haut’ aromas,

Silente traparolas

Kaj foje ĝi korŝiras.

 

Pro animsufero

Malsaniĝas haŭto:

Jen verŝajna masko

Aŭ animaresto.

 

Spite al vent’ petola

Aŭ mara kis’ volupta,

Animo plorsingultas

Kaj haŭto brule floras.

Maria Nazaré de C. Laroca

Kabo Frio, 09/01/2013.